ຄວາມຫມາຍຂອງຊຸດກິດຈະກຳການຮຽນຮູ້

ຊຸດກິດຈະກຳການຮຽນຮູ້ ຫຼື ຊຸດການຮຽນ-ການສອນມາຈາກຄໍາວ່າ Instructional Package ຫຼື Learning Package ທີ່ມີຢູ່ແລ້ວໃຊ້ຄໍາວ່າ “ຊຸດການສອນ” ເພາະເປັນ ສື່ທີ່ຄູນໍາມາໃຊ້ໃນການສອນ ແຕ່ ຕໍ່ມາແນວຄິດໃນການຈັດການຮຽນ-ການສອນທີ່ເນັ້ນຜູ້ຮຽນເປັນໃຈກາງໄດ້ເຂົ້າມາມີບົດບາດຫຼາຍຂຶ້ນ ບາງຄັ້ງອາດເອີ້ນທັງຫມົດເຫຼົ່ານີ້ວ່າ ຊຸດກິດຈະກຳການສອນ (ບຸນເກືອ ຄວນຫາເວດ, 2542, ໜ້າ. 91) ແລະ ໃນການຄົ້ນຄວ້າໃນການຄົ້ນຄວ້າຄັ້ງນີ້ໃຊ້ຄໍາວ່າ “ຊຸດກິດຈະກຳການຮຽນຮູ້” ເພື່ອໃຫ້ຄວບຄຸມກິດຈະກຳຂອງຄູ ແລະ ນັກຮຽນ ໄດ້ຝຶກປະຕິບັດ ແລະ ຄົ້ນຄວ້າດ້ວຍຕົນເອງ ຄູເປັນພຽງຜູ້ໃຫ້ຄໍາແນະນໍາ(Coach) ໂດຍມີຂະບວນການສ້າງຕາມຂັ້ນຕອນການສ້າງຊຸດກິດຈະກຳທຸກປະການໄດ້ມີນັກການສຶກສາຫຼາຍທ່ານເຂົາໄດ້ໃຫ້ຄວາມຫມາຍ ໄວ້ດັ່ງນີ້:

ກູ໊ດ (Good, 1973, p. 306) ໄດ້ໃຫ້ຄວາມຫມາຍຂອງຊຸດກິດຈະກຳ ໝາຍເຖິງ: ໂປແກຣມທາງການສອນທຸກຢ່າງທີ່ຈັດໄວ້ສະເພາະ, ມີວັດຖຸອຸປະກອນທີ່ໃຊ້ໃນການສອນ, ມີອຸປະກອນທີ່ໃຊ້ໃນການຮຽນ, ມີຄູ່ມືຄູ, ມີເນື້ອໃນ, ມີແບບທົດສອບ ແລະ ມີຂໍ້ມູນທີ່ເຊື່ອຖືໄດ້, ມີການກຳນົດຈຸດມຸ່ງໝາຍຂອງການຮຽນໄວ້ຢ່າງຊັດເຈນ. ຊຸດກິດຈະກຳນີ້, ຄູເປັນຜູ້ຈັດໃຫ້ນັກຮຽນແຕ່ລະຄົນໄດ້ສຶກສາ ແລະ ຝຶກຝົນດ້ວຍຕົນເອງໂດຍຄູເປັນຜູ້ຄອຍຖ້າແນະນຳເທົ່ານັ້ນ.

ແຄບເພລີຣ໌ ແລະ ແຄບເພລີຣ໌ (Kapfer,Phillip.; & Mirian Kapfer, 1972, ໜ້າ. 7-13) ໄດ້ໃຫ້ຄວາມຫມາຍຂອງຄຳວ່າຊຸດການຮຽນໄວ້ວ່າ: ເປັນຮູບແບບການສື່ສານລະຫວ່າງຜູ້ສອນກັບຜູ້ຮຽນ ຊຶ່ງປະກອບດ້ວຍຄຳແນະນຳໃຫ້ຜູ້ຮຽນໄດ້ເຮັດກິດຈະກຳການຮຽນຈົນບັນລຸພຶດຕິກຳທີ່ເປັນຜົນຂອງການຮຽນຮູ້, ສ່ວນເນື້ອໃນທີ່ນຳມາສ້າງຊຸດການຮຽນ ນຳມາຈາກຂອບເຂດຄວາມຮູ້ທີ່ຫຼັກສູດກຳນົດໃຫ້ຜູ້ຮຽນໄດ້ຮຽນຮູ້ຊຶ່ງຕ້ອງສື່ຄວາມຫມາຍໃຫ້ແກ່ຜູ້ຮຽນຢ່າງຊັດເຈນ, ຈົນຜູ້ຮຽນເກີດພຶດຕິກຳຕາມເປົ້າໝາຍ ຫຼືຈຸດປະສົງການຮຽນຮູ້ທີ່ເປັນລັກຊະນະພຶດຕິກຳ.

ຈາກແນວຄວາມຄິດ ແລະ ຄວາມໝາຍຂອງນັກການສຶກສາທີ່ຫຼາຍທ່ານໄດ້ກ່າວມາຂ້າງເທິ່ງນັ້ນ ສາມາດສະຫຼຸບໄດ້ວ່າ: ຊຸດກິດຈະກຳການຮຽນຮູ້ ໝາຍເຖິງ: ຊຸດການຮຽນ-ການສອນທີ່ເນັ້ນໄຫ້ຄູ ແລະ ນັກຮຽນໄດ້ຝຶກການປະຕິບັດ ແລະ ແກ້ໃຂບັນຫາການຮຽນເຊິ່ງກັນ ແລະ ກັນ ໂດຍເນັ້ນໃຫ້ຜູ້ຮຽນເກີດການຮຽນຮູ້ ແລະ ມີຜົນສຳເລັດຕາມເປົ້າໝາຍ.

ค้นหาบล็อกนี้

ການສຶກສາ ເພື່ອພັດທະນາຄວາມຮູ້